اخبار السودان اليوم فرصة المريخ في الفوز بالممتاز بعد تتويج الهلال به

سودارس 0 تعليق 13 ارسل لصديق نسخة للطباعة تبليغ

• من رأسي :
• العزيز صلاح نمر انصحك نصيحة صادقة قبل تلاتة يوم من مباراة القمة تشوف ليك (بطانية) سميكة وتتحشر تحتها في السخانة دي – احسن ليك تشعر ب (الرجفة والبرد) قبل مباراة القمة من تشعر بيها اثناء المباراة.
• من كراسي :
• قال عمدة نيويورك الراحل فيورديللو لاجوراديا يوما : ( لا فرق عندي اذا احرقت كل جسوري ورائي ..فانني لا اتراجع ابدا).
• طعم القهوة زي عاوز يجيب ليه نكهة (شيبولايه) كدا..
• ما عارف دا احساس عندي براي – وإلّا القهوة (عموما) بقت كدا..
• مُتلوخبطة.
• مُتلوخبطة دي ما تشتغلوا بيها كتير.
• مرات بجيب لي حاجات برة العمود.
• يتخيل لي (القهوة) اتملصت من نكهتها من اجل (شيبولا).
• القهوة ما عندها ذنب..البعمل فيه شيبولا دا لو عملوا في مباراة القمة صلاح نمر من الدقيقة الخامسة بيشطبوه من كشوفات المريخ.
• ينجد مراتب…
• يصلح سراير..
• يركب ستائر..
• الزول دا بعمل اي حاجة في (المدافع) بما في ذلك كشف النظر ومراجعة السجل المدني.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• العلم الحديث في الهلال الايامات دي علم (الثعلبة).
• صهيب الثعلب بقدم في (تمريرات) اعادة للساحة الفنية كلاسكيات عثمان حسين وحسين بازرعة.
• زي عاوز تقول حاجة…
• وما قادر تقول شيء..
• زي عاوز تسأل…وما عاوز تسأل…
• واقف بين بين..
• عيونك مضوهبة زي الساعة المقدمة..
• مُتخولع متل (فرخ القطا الاماتو ركن وفرن).
• مُتوجع متل (سواة العاصفة في ساق الشتيل الني).
• الليلة الجمعة وإلّا الاربعاء؟.
• هجوم الهلال بقى يلخبطك في ايام الاسبوع.
• يدخل بيك في حتة ويطلع بيك في حتة تانية.
• مدافع الامل عطبرة سألوه عن نتيجة المباراة ..قال ليهم غايتو لغاية قون ابوعاقلة كانت 1 / صفر لينا لكن بعد الهدف دا حصل شنو والله ما عارف؟.
• في حلتنا في (دكان) ما فيه اي شيء.
• لا استغفر الله..فيه (عدس) بس.
• لا فيه طحنية.
• ولا عسل انجليزي.
• ولا رز.
• ولا دقيق سيقا.
• لا مناديل ورق.
• لا علب حلاوة.
• لا بندول.
• ما فيه اي شيء.
• تمشي ليه عشان تجيب ليك ساردين.
• بقول صاحب الدكان ساردين مافي.
• تقول ليه طيب ادينا زيت.
• بقول ليك زيت مافي.
• صابون؟؟؟
• بقول ليك صابون مافي.
• في النهاية تقول ليه خلاص عليك الله اديني (عدس).
• في علاقة بين العدس والصابون؟.
• يوزن ليك (العدس) تشيلو وترجع.
• تجيه يوم تاني.
• تسألو من الشعيرية.
• يقول ليك شعيرية مافي.
• تسألو من البسكويت.
• يقول ليك بسكويت مافي.
• تقول ليه طيب بارد عندكم شنو؟.
• يقول ليك بارد مافي والله.
• تتجبر في النهاية وتقول ليه خلاص اديني عليك الله (عدس).
• في علاقة بين البارد والعدس؟.
• تشيل العدس وتمشي على بيتكم.
• الزول دا ما عندو اي حاجة غير العدس.
• لدرجة اني بقيت وقت امشي ليه بختصر المواضيع دي..بقوم من البداية بقول ليه والله كنت عاوز لي (رصيد) ..وطالما (رصيد) ما عندك عليك الله اوزن لي (عدس).
• في علاقة بين الرصيد والعدس.
• اطلع من البيت عاوز لي (زبادي).
• امشي اقيف في الدكان واقول ليه اديني (عدس).
• في علاقة بين العدس والزبادي.
• يرسلوك لي (بيض).
• ترجع بي (عدس).
• في علاقة بين البيض والعدس.
• حكاية (العدس) دا هسع بتذكرني ليكم بي ضربات الجزاء للمريخ.
• اللاعب يمسكوه ما يمسكوه (ضربة جزاء) للمريخ.
• برة الخط ..جوة الخط ..(ضربة جزاء) للمريخ.
• زي العدس.
• الكورة تكون (دقيقة حداد) – الحكم بحسب للمريخ ضربة جزاء.
• في علاقة بين الدقيقة حداد وضربات الجزاء.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• خلونا نفلترها.
• خلونا نحددها.
• عاوزين نعرف (حسابيا) كدا – فرصة المريخ في الفوز بالدوري الممتاز (النسخة الحالية) بعد ان توّج بها الهلال امس اثر فوزه على الامل عطبرة بخماسية (ضربة جزاء) ما فيهن.
• اوعكم تقولوا لي المريخ ما عندو امل – والموضوع دا مستحيل.
• عاوزين نحرر سوق المباريات القادمة.
• معقولة بس عاوزننا ندخل مباراة القمة القادمة بي (ناموسياتنا).
• ندخل بي مخداتنا.
• لازم نسخن المباراة شوية.
• يا ربي المريخ محتاج ليه كم (سمير فضل) عشان يفوز بالممتاز.
• عاوز ليه كم (اعادة).
• قطر (سمير فضل) ..ما بحلكم مننا وما بشيل الدوري الممتاز من الهلال.
• خلاص الموضوع دا انتهى.
• مفروض جمال الوالي طوالي يشوف ليه (سيكافا).
• لكن خلونا نحاول.
• خلونا نشوف ليهم اي بصيص امل كدا.
• ان شاءالله (وصافة).
• جماعتكم في (الوصافة) اتجهجهوا.
• تتخيلوا مطلوب من المريخ شنو عشان يفوز بالدوري الممتاز بعد التتويج دا؟.
• لوري طوب؟.
• قلاب اسمنت؟.
• الحاجات دي ما بتجيب ليها (بطولة).
• اقول ليكم.
• جيبوا ليكم (كديسة سوداء) ورطل لبن.
• عارفكم ح تقعدوا تمزمزوا في (رطل اللبن).
• اقفلوا الكديسة السوداء ورطل اللبن في غرفة واحدة.
• بعد 48 ساعة لو لقيتوا الكديسة شربت ليها (جغمة) من اللبن – اقنعوا من الممتاز.
• واقنعوا من (اللبن) ذاتو.
• عارفكم (اللبن) ممكن يحرقكم اكتر من (الممتاز).
• اصلو الممتاز انتوا لا ناسو ولا اهلو ولا عندكم ليه شعر.
• لكن هسع عليك الله قايل لينا جيبوا كديسة (سوداء) ليها – ما في اي داعي للون دا..ولا عندو دور في القصة.
• كديسة عادية من غير تحديد لونها ممكن تشرب اللبن.
• الموضوع دا ما عندو علاقة باللبن.
• كان تقول كديسة وخلاص بدل ما تحدد لينا لونها.
• نحن عاوزين نشارك بيها في الاولمبياد.
• شفتوا انا حددت ليكم لونها مخصوص – عشان ناس المريخ بعدين ما ينكروا لينا الواقعة.
• عارفكم بتاعين غلاط وشكاوي.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• لو (رطل اللبن) كتير عليكم مع فلسفتكم دي ..موضوع الكديسة دي انسوه.
• جيبوا ليكم (قرد) و 4 موزات.
• اقفلوا القرد وال (4) موزات في غرفة واحدة.
• لو القرد مشى على (الموزات) – اقنعوا من موضوع (الممتاز).
• اول نحن عندنا امل – نحن قنعنا من (الممتاز) دا من حل لجنة الاستئنافات.
• مريخابي بعد الهلال ما سجل (شيبوب) عبر كوبري القيروان – قال لي الواحد فينا بقى يجيب البطيخة من السوق يفتحها تطلع (زرقاء).
• قلت ليه بعد (الجوهرة الزرقاء) ، عاوز تلقى ليك بطيخة (حمراء) – دي في الرد كاسل ما بتلقاها.
• غايتو المريخ عندو فرصة وحيدة للفوز بالممتاز هذا الموسم.
• تتموا باقى دوريكم دا في (الهند).
• قالوا ليك الهند فيها حكام.
• ضربة الجزاء بحسبوها ليكم من (التسخينة).
• ما عندكم اي مشكلة.
• كدا انتوا احسموا موضوع (الوصافة).
• موضوع (اللقب) دا كبير عليكم.
• اقعدوا مع ناس الاهلي شندي زي ما قعدتوا مع ناس الاهلي مدني ..واحسموا الموضوع.
• ناس الاهلي شندي ديل ..الظاهر عليهم ما عندهم رغبة في (الوصافة).
• ممكن يقتنعوا ليكم.
• زي ما اقتنعوا ليكم ناس الاهلي مدني.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• …………….
• و
• علي كيفنا ..المباراة القادمة ممكن نلعب بشه الصغير في الدفاع.
• ونرجع سادومبا يلعب طرف علي كيفنا.
• ما عندنا مشكلة.
• نقدم مكسيم رأس حربة …وولاءالدين يقيف حارس مرمي.
• عاوزين نجرب.
• ما عندنا شغلة.
• وما عندنا موضوع.
• في زول عاوز مننا حاجة.
• ممكن المباراة الهلال يدخلها بعد الشوط التاني.
• نتعب من الشوط الاول ليه؟.
• وممكن ناس صهيب الثعلب وحسين الجريف يشاركوا في المباراة بي جلاليبهم.
• يتعبوا ليه؟.
• الجابرهم شنو؟..
• ناس حسموا الممتاز ..قبل اسبوعين ..تاني عاوزين منهم شنو؟.
• اتونسوا ساكت.
• خلونا نشوف سباق (الوصافة) دا.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ………….
• السيدة (ل) – حكاية تلفوني كان في الشاحن دي ما تقوليها لي.
• وقرّط على كدا.

عزيزي الزائر لقد قرأت خبر اخبار السودان اليوم فرصة المريخ في الفوز بالممتاز بعد تتويج الهلال به في موقع مصر 24 ولقد تم نشر الخبر من موقع سودارس وتقع مسئولية صحة الخبر من عدمة علي عاتقهم ويمكنك مشاهدة مصدر الخبر الاصلي من الرابط التالي سودارس

أخبار ذات صلة

0 تعليق