اخبار السودان اليوم كل دقيقة والسودان بي خير!!

سودارس 0 تعليق 3 ارسل لصديق نسخة للطباعة تبليغ

في نوع من الناس سوداوي الدواخل لا يحسن الظن.. أعماقو متكورة وما اجتهد يوم واحد يزيل الكدر من أعماقو ودي!! وكل يوم أنا قاعد أفكر كتير وأقول في نفسي، يا ربي ده من شنو؟ مرات أقول يمكن السبب وراثي. زمان قريب كلام كتبو واحد إيطالي اسمو “مبروز” عالم كان بيبحث في علم الجريمة وقرب يقنع العالم بي إنو في ناس مجرمين تبعاً لي جيناتم الوراثية لكن الحمد لله تصدوا له بعض العلماء وأثبتوا عدم صحة نظريتو.. “لمبروز” فحص أجسام عدد من عتاة المجرمين السفاحين وهاك يا قياس لي الجماجم والعظام بتاعت السفاحين، والغريب قياسو ده، اتفق مع عدد مقدر من عتاة المجرمين. { يعني لو صدقت نظريتو ممكن ببساطة نعاين للزول نعرف طوالي ، لو كان ده زول كويس ولا زول ما كويس!! لكن فشل “لمبروز” في إثبات نظريتو لكن براي لاحظت إنو في بعض من ملامح نظريتو صحيح..
{يعني تدخل على ناس تسلم عليهم ببشاشة، بعضهم يرد على سلامك بي ترحاب وفرح ووش مبتسم وواحد يقوم يقالدك وواحد مكشر وشو وكأنك ما سلمت عليهو ومرات يبحلق فيك وعيونو تنطق بالشر وطبعاً ده ما سمع حديث الحبيب صلى الله عليه وسلم “تبسمك في وجه أخيك صدقة” أه أده زول بيتعاشر؟
{وهناك من يبخس أشياءك، تكون لابس ليك لبسة سمحة يقول ليك “المرحوم مقاسو قدرك” يعني اللبسة السمحة دي أدوك ليها أهل ميت مقاسو قدرك!! والعجب لو الناس بتحبك، يقول “العاجبو فيهو شنو؟، ولو أنعم الله عليك بي مال أو نعمة يقول “سافنها حرامية أولاد كلب” ومرات يحسدوك حتى في صلاتك وشايل سبحتو وعامل بتاع ربنا!!
{ده دجال وأكبر مرابي وحرامي!! وممكن أحكي ليكم عن نماذج ما أنزل الله بها من سلطان، قال لي قريت اسمك مع ناس الحوار الوطني، قلت ليهو: أيوه أنا عضو في لجنة بروفيسور “علي شمو”، أها وعملتو شنو؟، قدمتا للسيد الرئيس ملخص لي حوار قطاعات الثقافة والرياضة والتربية والتعليم، أي حاجة لاتقالت؟؟ أي حاجة اتقالت!! “على منو الكلام ده!! طبعاً حذفتو حاجات؟ طبعاً ما كملت حديثي مع الزول ده لأنو سيء النية ومهما حاولت إقناعو لن أنجح لأنو سيء الظن ودواخلو سوداء ومتنيلة بي ستين نيلة!! {طيب زول ذي ده يعملو معاهو شنو؟ والغريب الزول البكلمكم عنو ده حاصل على شهادات عليا وأستاذ جامعي وبيكتب في الجرايد.. وطبعاً دي مصيبة كبيرة!! يعني ده معلم أجيال!!
{طيب حيعلمهم شنو وهو ذو دواخل ما نظيفة حاقد وشكاك ونيتو أسود من الفحم!! أنا بقول دائماً زي الزول ده قطعاً ابن بيئتو مسكين يكون أبوهو وأمو كانوا بتشاكلوا طوالي!!
{ولمن يقعدوا يأكلوا أبوهو بيقول ليهو “تعال اتسمم!! أو تعالوا اطفحوا إنتو عارفين الأكل ده جاي من ين؟؟
{والأسرة الواحدة يا جماعة الخير هي إنوا المجتمع كما يقول علماء الاجتماع ولو صلحت النواة صلح الزرع وصلحت الثمرة!! والكلام ده بقولوا للحبان الدواخلهم مضيئة وعطرة ونظيفة أمة محمد بخير والله العظيم!!
{وأهل السودان فيهم جينات الخير وأنا عندي هواية مراقبة البشر وسافرت كتير واتكلمت مع أجناس بالرطانة وبالعربي وفي كل مرة تتأكد لي حقيقة إنو أهلي ناس السودان لسه فيهم الخير، والدليل السمعة الطيبة البيتمتعوا بيها من هاجروا من الوطن!! إنت سوداني.. أيوه أنا سوداني.. إنتو أحسن ناس!! {أولادي ما بخليهم يصادقوا غير أولاد السودانيين!! قالا لي أحد المواطنين العرب في زيارتي الأخيرة لإحدى الدول العربية الشقيقة، طبعاً يومها – نمت فرحان غرير العين!! بعدين أنا زعلان لأنو الدولة ما احتفلت بي تقرير الأمم المتحدة الذي أبانت فيه أمانة وشهامة وصدق الإنسان السوداني!!
{وبرضو يمكن ما احتفلنا بالتقرير لأنو الموضوع بالنسبة لينا “عادي زي الزبادي” طيب شنو قولكم في أبحاث علماء الآثار الأجانب الاكتشفوا إنو أصل الحضارة منبعها السودان بل كادوا أن يقولوا أبونا آدم ذاتو سوداني!! طيب عارفين ليه ما قام ربيع عربي في السودان؟
{السبب هو إنو السوداني عاقل وراقي ومتحضر بالفطرة والرزق عند الله.. وممكن نتعشى بي كباية شاي وعيشة ناشفة ونصلي العشاء ونقرأ آية الكرسي!! طيب كلامي ده لزومو شنو؟ لزوموا المناصحة ويقول لي كل الناس نحن أهل السودان عندنا كل مقومات الخير والعيش الكريم، لكن المحزن فينا الزول المكابر والأعماقو ما نظيفة المحتاج تقول ليهو أقعد في الواطة وصلِ على النبي ويد الله مع الجماعة وبالحوار حل القضية!!
{وكل دقيقة والسودان بخير
التيلر

عزيزي الزائر لقد قرأت خبر اخبار السودان اليوم كل دقيقة والسودان بي خير!! في موقع مصر 24 ولقد تم نشر الخبر من موقع سودارس وتقع مسئولية صحة الخبر من عدمة علي عاتقهم ويمكنك مشاهدة مصدر الخبر الاصلي من الرابط التالي سودارس

أخبار ذات صلة

0 تعليق