مشاهير: دعاء فاروق مدافعة عن الوفد الفني بروسيا: "بأي حق بتحكموا على الناس"

مصراوى 0 تعليق ارسل طباعة تبليغ حذف

كتبت- سما جابر:

واصلت الإعلامية دعاء فاروق، دفاعها عن وفد الفنانين الذين سافروا إلى روسيا دعمًا وتشجيعًا للمنتخب المصري في كأس العالم.

ونشرت دعاء عبر حسابها على موقع انستجرام، مجموعة صور تضم عدد من فناني مصر الراحلين، منهم إسماعيل يس ونور الشريف وأحمد زكي ومعالي زايد وفاتن حمامة وغيرهم.

وعلقت على الصور قائلة: "دي صور لمجموعة من الفنانين اللي بنحبهم كلنا واللي أسعدونا.. دول نماذج لفنانين توفاهم الله بس فيه منهم وزيهم آلاف ماتوا وعايشين واللي مفيش فيلم بييجي ليهم غير لما نتفرج ونضحك ونتبسط.. هم مصدر سعادة وتسلية وملاذ ومتنفس لأي حد متضايق أنه يفك عن نفسه شوية لما يشوفهم".

وأضافت: "أنا لما بتفرج عليهم مببطلش ادعي لهم بالرحمة والمغفرة والجنة.. بجد بدعي لهم من قلبي وغيرهم كتير.. ولما بنشوف منهم عايشين بنتبسط إننا شايفينهم.. أنا اعرف منين ربنا غضبان منهم ولا هيدخلوا جنة ولا نار؟.. اللي انا متربية عليه هي جملة اتربينا عليها كلنا (من حبه ربه حبب فيه خلقه).. ليه التعالي على الناس اللي بيفرحونا على أساس إننا احنا اللي منزلين من السما بجناحات وهم اللي كلهم ذنوب وأخطاء؟ مين يعرف أصلًا؟".

وتابعت: "ليه بتتفرجوا عليهم وبعدين تشتموهم هم واللي زيهم.. إيه موضوع إننا مصنفين الناس أن فيه حبة فوق وحبة تحت، ومين قال إننا فوق.. إيه حكاية كنا فاكرينك عشان مذيعة محجبة غيرهم بس طلعتي زيهم؟!! بأي حق بتحكموا على الناس وبتصنفوهم؟ زيهم ولا غيرهم انتوا تعرفوني منين ولا بتحكموا عليا منين؟".

واستطردت: "إيه كم الناس اللي باعتالي إنك نزلتي من نظرنا عشان بتدافعي على شوية مطبلاتية وطلعتي زيهم؟! انتو تعرفوني منين يا جماعة ولا تعرفوا الناس منين؟ بتحكموا عالمظهر وبناءً عليه بتدخلوا الناس جنتكم وبتخرجوهم منها؟؟ الله الغني الله الغني.. طظ في الشهرة دي اللي هتخلي الواحد يبقي عرضة للناس إنها تشتمه وتخوض في سيرته وتدي لنفسها الحق إنها تطرده من رحمة ربنا".

وأكدت دعاء فاروق أنها سيدة تحترم نفسها وعقلها ولا تحكم على أي شخص دون أن تعرفه وتعاشره جيدًا، لافتة إلى أنها ستحذف كل التعليقات التي تتطاول عليها أو تتسبب في أي ضيق لأبنائها، مُختتمة: "ربنا يرحمنا برحمته ويرحم كل البشر برحمته، ولا عمري اتمنى لأي حد أي سوء ولا يمكن اتعالى على مخلوق.. والفنانين دول ناس زيهم زينا ربك هو اللي هيحاسب وهيوزن الحسنات والسيئات وكل واحد اتظلم هياخد حقه من اللي ظلمه.. كل ابن آدم خطاء وخير الخطاءين التوابون.. اللهم احسن خاتمتنا وارزقنا باللي يدعيلنا بالخير والرحمة والمغفرة".

هذا المحتوي ( مشاهير: دعاء فاروق مدافعة عن الوفد الفني بروسيا: "بأي حق بتحكموا على الناس" ) منقول بواسطة محرك بحث الموقع وتم نقله كما هو من المصدر ( مصراوى )، ولا يعبر عن وجة نظر الموقع ولا سياسة التحرير وانما تقع مسئولية الخبر وصحته علي الناشر الاصلي وهو مصراوى.

أخبار ذات صلة

0 تعليق